Təhsil Nazirliyinin fəaliyyətinin təkmilləşdirilməsi və “Azərbaycan Respublikasında bir sıra dövlət orqanlarının strukturunun optimallaşdırılması və idarə edilməsinin təkmilləşdirilməsi ilə bağlı əlavə tədbirlər haqqında” Prezident fərman imzalayıb.
Fərmanda qeyd olunur ki, Azərbaycan Respublikası Təhsil Nazirliyinin tabeliyində olan Akkreditasiya və Nostrifikasiya İdarəsi Azərbaycan Respublikası Təhsil Nazirliyinin tabeliyində publik hüquqi şəxs statusu olan Təhsildə Keyfiyyət Təminatı Agentliyinə çevrilmə yolu ilə yenidən təşkil edilsin.
AzEdu.az yeni yaranan agentliyin fəaliyyət istiqamətləri ilə bağlı Təhsil Nazirliyi yanında İctimai Şuranın üzvlərinin fikirlərini öyrənib.
Təhsil eksperti və Təhsil Nazirliyi yanında İctimai Şuranın sədri Şahlar Əsgərov bu tip agentliklərin bir çox ölkədə fəaliyyət göstərdiyini qeyd edib.
“Təhsil Nazirliyi yanında Agentliyin yaradılması mənim üçün yenilik oldu. Bu Azərbaycan təhsili üçün fərqli bir addımdır. , 15 il əvvəl Rusiya təhsil sistemində 3 qurum fəaliyyət göstərirdi. Bunlar: Təhsil Nazirliyi,Təhsil Agentliyi və Elm və Təhsilə Nəzarət Şurası idi. O zaman mən Təhsil Agentliyinin yaradılması arzusunda idim. Lakin bu baş tutmadı. Rusiyada Təhsil Nazirlıiyi təhsil siyasətini həyata keçirirdi.Təhsildə iqtisadi məsələlərə agentlik cavabdeh idi. Elm və Təhsilə Nəzarət Şurası isə qəbul imtahanları, dövlət qulluğu ,alimlərin attestasiyasına nəzarəti təmin edirdi.
Ölkəmizdə də adıçəkilən agentlik yaradıldı. Mən onun əsasnaməsi ilə tanış olanda Rusiyada olan agentliyə bənzəmədiyini gördüm. Bu yeni bir qrumdur. Agentlik Təhsil Nazirliyinin nəzdində fəaliyyət göstərir və kifayət qədər müstəqildir. Agentliyin öz strategiyası olacaq. Bu təhsil sistemində və strukturunda yeniliklərin yaradılmasını təmin edəcək. Təhsillə bağlı çoxlu problemlərin həll olunmasında bu qurum yaxından iştirak edəcək.Ona görə də mən agentliyin yaradılmasına sevinirəm”.
Təhsil eksperti və Təhsil Nazirliyi yanında İctimai Şuranın sədr müavini Nadir İslafilov agentliklə bağlı düşüncələrini bölüşüb.
“Bu Agentliyin yaradılması zəruri idi. Ölkə Başçısının 29 dekabr 2019-cu il tarixli Fərmanından da göründüyü kimi Agentlik Təhsil Nazirliyinin fəaliyyətini təkmilləşdirmək və təhsil sisteminin müasir tələblərə uyğun davamlı inkişafını təmin etmək məqsədilə ilə yaradılıb və Azərbaycan Respublikasında bir sıra dövlət orqanlarının strukturunun optimallaşdırılması və idarə edilməsinin təkmilləşdirilməsinə xidmət edir. Əslində, Təhsil Nazirliyinin tabeliyində olan Akkreditasiya və Nostrifikasiya İdarəsi Təhsil Nazirliyinin tabeliyində publik hüquqi şəxs statusu olan Təhsildə Keyfiyyət Təminatı Agentliyinə çevrilib ki, bu da bilavastə “Azərbaycan Respublikasında bir sıra dövlət orqanlarının strukturunun optimallaşdırılması və idarə edilməsinin təkmilləşdirilməsi ilə bağlı əlavə tədbirlər haqqında” Prezidentinin 2019-cu il 17 yanvar tarixli 479 nömrəli Fərmanından irəli gələn vəzifədir. Agentlik yaradılmasının nə dərəcədə lazımlı və əhəmiyyətl olmasının təcrübədə artıq sınamışıq və onun müsbət nəticələrinin bilavasitə şahidi olmuşuq. Təsəvvür edin ki, bir müddət əvvəl Azərbaycan Respublikasının Təhsil Nazirliyi yanında Peşə Təhsili üzrə Dövlət Agentliyinin yaradılması və fəaliyyətinin təmin edilməsi haqqında Azərbaycan Respublikası Prezidentinin Fərmanından sonra pesə təhsili sisteminin dirçəldilməsi üçün sadalanmasına ehtiyac görmədiyim nə qədər işlər görüldü, peşə təhsilinə yanaşma necə dəyişşdi. Ümid etmək olar ki, çox keçməz, yeni yaradılan bu Agentlik də Akkreditasiya və Nostrifikasiya sahəsinə yeni nəfəs gətirər”.
Azərbaycan Gənc Alim, Aspirant və Magistrlər Cəmiyyətinin sədri, Azərbaycan Respublikası Təhsil Nazirliyi yanında İctimai Şuranın məsul katibi, fəlsəfə doktoru İlqar Orucov yeni yaranan qrumla bağlı düşüncələrini bölüşüb:
“Cənab Prezident Təhsil Nazirliyinin fəaliyyətinin təkmilləşdirilməsi istiqamətində çox ciddi fərman imzaladı və bu sənədlə Təhsil Nazirliyinin Akkreditasiya və Nostrifikasiya bazası əsasında təhsilin keyfiyyətinə təminat verəcək agentlik formalaşdırıldı. Hesab edirəm ki, bu qrum Təhsil Nazirliyinin fəaliyyətində keyfiyyətin təmin olunmasına cavabdeh olacaq. Qurumun digər üstün tərəfi ondan ibarətdir ki, bu agentlik publik hüquqi şəxs statusunda formalaşıb. Bu o deməkdir ki, qrum yalnız dövlət büdcəsi və vəsaiti hesabına fəaliyyət göstərməyəcək. Onun əlavə gəlirlər əldə etmək üçün imkanları olacaq. Bu da agentliyin daha geniş səlahiyyətlər çərçivəsində fəaliyyətinə gətirib çıxaracaq.
Son dövrlərdə Cənab Prezidentin təhsillə bağlı imzaladığı bütün sənədlər keyfiyyət göstəricisinin təmin olunmasında başlıca şərti təmin edir. Məsələ ondan ibarətdir ki, Azərbaycan yeni bir inkişaf mərhələsinə qədəm qoyub. Azərbaycanda təhsilin inkişaf etdirilməsi, elmi cəmiyyətin qurulması,əmək bazarına cavab verə biləcək peşəkar kadrların yetişdirilməsi kimi məsələlər öz əksini tapıb. Eyni zamanda Azərbaycan iqtisadiyyatının şaxələndirilməsi ilə bağlı Cənab Prezidentin ortaya qoyduğu mövqe və siyasət ona gətirib çıxarır ki, təhsil sahəsində ciddi islahatlar aparılmalıdır. Çox sevindirici haldır ki, Təhsil Nazirliyi bu istiqamətdə sistemli şəkildə işlər aparır və ölkə başçısının çağrışlarına cavab verir.Heç kimə sir deyil ki, Azərbaycanda son dövrlərdə təhsilin keyfiyyətinin yüksəldilməsi ilə bağlı çox ciddi tədbirlər həyata keçirilir.Yeni yaradılan agentlik Təhsil Nazirliyinə əlavə imkanlar və fəaliyyət istiqamətləri verəcək. Hesab edirəm ki, agentlik ölkə başçımızın təhsildən gözləntilərinə cavab verəcək və Azərbaycanın inkişaf tempinə uyğun olaraq təhsilin keyfiyyətinin yaxşılaşdırılması istiqamətində işləri yerinə yetirəcək, təhsilimizin həm avropa məkanında, həm də dünya təhsil sistemində qabaqcıl yerlərdən birinə gətirəcək. Təhsil Nazirliyi yanında İctimai Şura olaraq ,biz bu agentliklə əməkdaşlıq edəcək və onun fəaliyyətinə dəstək verəcəyik. Əminəm ki, yeni yaradılan qrum təhsildə keyfiyyətin təmin olunması və onun bütün pillələrində keyfiyyətli kadr bazasının yaradılmasına yardımçı olacaq
Qeyd edək ki, Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan Respublikası Təhsil Nazirliyinin fəaliyyətini təkmilləşdirmək və təhsil sisteminin müasir tələblərə uyğun davamlı inkişafını təmin etmək məqsədilə Təhsil Nazirliyinin fəaliyyətini təkmilləşdirmək və təhsil sisteminin müasir tələblərə uyğun davamlı inkişafını təmin etmək məqsədilə , Azərbaycan Respublikası Təhsil Nazirliyinin tabeliyində olan Akkreditasiya və Nostrifikasiya İdarəsi Azərbaycan Respublikası Təhsil Nazirliyinin tabeliyində publik hüquqi şəxs statusu olan Təhsildə Keyfiyyət Təminatı Agentliyini yaradıb.
