Dövlət İmtahan Mərkəzində 3 oktyabr 2020-ci il tarixində növbəti SAT və TOEFL iBT imtahanları keçirilib. 

Mərkəzdən AzEdu.az-a verilən məlumata görə, ehtiyat tədbirləri çərçivəsində imtahan binasına daxil olan iştirakçılarının məsafədən ölçə bilən elektron termometrlə bədən hərarətləri yoxlanılıb, zəruri dezinfeksiyaedici vasitələrdən istifadə olunub və imtahan otağında iştirakçıların bir-birindən lazımi uzaq məsafədə əyləşdirilməsi təmin olunub.

SAT imtahanında 46 nəfər iştirak edib (1 nəfər SAT esse, 10 nəfər isə SAT Subject imtahanı verib).

Növbəti SAT (SAT Subject) imtahanının noyabrın 7-də keçirilməsi nəzərdə tutulur.

SAT imtahanına qeydiyyatdan keçmək haqqında ətraflı məlumatı DİM-in rəsmi internet saytından əldə etmək olar: http://dim.gov.az/activities/exams/sat/

TOEFL iBT imtahanında isə 12 nəfər iştirak edib.

İştirakçılar imtahan nəticələrini ETS-in saytında yaradılmış şəxsi hesab vasitəsilə 6 gün sonra onlayn şəkildə öyrənə bilərlər.

Növbəti TOEFL iBT imtahanının oktyabrın 10-da keçirilməsi nəzərdə tutulur.

Qeydiyyatdan keçmək qaydaları haqqında linkdən ətraflı məlumat əldə edə bilərsiniz: http://dim.gov.az/activities/exams/toefl/