Mövcud problemlərə qarşı innovativ yanaşma ilə fərqlənən “Dərs Evi” bu dəfə hər insanın həyatında vacib rol oynayan məsələyə - peşə seçiminə toxundu. 

AzEdu.az xəbər verir ki, iyunun 24-də tarixində “Holiday Inn” hotelində şagirdlər və valideynlər üçün “Düzgün peşə seçimi etməyin vaxtıdır” adlı seminar keçirilib.

Seminarın moderatoru, DJ Fateh ilk növbədə iştirakçılar ilə öz hekayəsini bölüşdü. 

“İllər öncə bu cür testdən keçmək imkanım olsa idi, dörd ilimi sevmədiyim ixtisasın öyrənilməsinə sərf etməzdim. Uğursuz mühəndis olmaqdansa, o vaxt heç də nüfuzlu olmayan, lakin mənə həzz verən işlə məşğul olmağa başladım və radioya işə düzəldim.

İndi qazancım bir çox mühəndislərin qazancından yüksəkdir və mən işimi çox sevirəm”, – deyə aparıcı bildirib. 

“Dərs Evi”nin icraçı direktoru - Çikaqo Universitetinin elmlər namizədi Pavel Belorusskiy, beynəlxalq təcrübəyə əsaslanaraq “Dərs Evi”nin təhsil sahəsində gördüyü işlər, əldə olunan mühüm nəticələr barədə danışdı. Həmçinin, peşə seçiminin nəinki bir insanın taleyinə, o cümlədən cəmiyyətə də təsirini vurğulayıb. 

Pavel Belorusskiy: “Şagirdlərin düzgün peşə istiqamətini öncədən müəyyən etmək, onlara daha çox uğur qazandıran sənəti aşkarlamaq imkanı eyni zamanda bir neçə vəzifəni yerinə yetirir. Gənclər gördükləri işə həvəslə yanaşır və həyatdan zövq alır, valideynlər övladlarını uğurlu və xoşbəxt görür, nəticədə isə Azərbaycana səmərə gətirən yeni peşakarlar nəsli böyüyür.”

Gənclərə peşə seçimi zamanı dəstək olmaq, onlara düzgün istiqamət vermək məqsədilə, cənab Belorusskiy “Dərs Evi” və Moskva Dövlət Universitetinin birgə layihəsi olan “Peşə seçimi testini” təqdim etdi. Bu test abituriyentlərin maraqlarını, şəxsi keyfiyyətlərini, bacarıqlarını qiymətləndirməyə imkan verir.

“Peşə oriyentator” kompleksi üzrə testi keçən hər kəs, nəticələri çap olunmuş şəkildə əldə edir və öz psixoloji portretini görür. Daha sonra, testin nəticələrinə əsasən psixoloq peşə konsultasiyasını keçirir və şagirdə uyğun peşələrin siyahısını, bu peşələrin tədris olunduğu ali məktəblərin adlarını və bir sıra lazımlı tövsiyələri verir. 

Pavel Belorusskinın geniş və əhatəli nitqindən sonra, Heydər Əliyev adına Müasir Təhsil Kompleksinin direktor müavini, Anar Məmmədov  peşə seçiminin uşaqların təhsilinə psixoloji təsirindən danışdı.

Anar Məmmədov: “Məktəbimizə müəllim qəbulu edərkən, onlara həmişə 2 sual veririk: 1) İxtisası seçərkən pedaqoji fakültəni siyahıda neçənci yerdə yazmısınız? 2) Gələcəkdə müəllim işləmək istəyirsinizmi? 300 nəfərdən cəmi beş nəfər pedaqoji fakültəni siyahıda birinci növbədə yazdıqlarını söyləyir və bu o deməkdir ki, bu gün gənclər istəmədikləri peşələrə üz tutur və məhz buna görə də, biz mütəxəssisləri xaricdən cəlb etməyə məcbur oluruq”.

Tədbirin növbəti spikeri, “Gilan Holding”in İnsan Resursları departamentinin direktoru, Allahverdi Bağırov peşə seçimi zamanı əmək bazarının vəziyyətinin və ölkədə baş verən tendensiyaların vacibliyini qeyd etdi.

300 nəfərə yaxın iştirakçısı olan tədbir sual-cavab sessiyası ilə yekunlaşdı və hər kəs dəvət olunan spikerlara onları maraqlandıran sualları verə bildi. 

“Dərs Evi” 2015-ci ildən təhsil sahəsində fəaliyyət göstərən innovativ tədris mərkəzdir.  Burada Peşə seçimi testini keçməklə 13 – 18 yaşlı gənclər həm təhsil, həm də karyera imkanlarını müəyyənləşdirib, ən uğurlu ola biləcəkləri istiqaməti seçmək imkanı qaza bilərlər. Bunun üçün sadəcə “Dərs Evi” ilə əlaqə saxlamaq və ya tədris mərkəzinə gəlmək lazımdır.