Ukraynadan təxliyə olunan vətəndaşlarımızın məktəbli övladları Azərbaycanda təhsilə cəlb olunublar.

Respublikanın müxtəlif bölgələrində öz yaxınlarının yaşadığı ərazilərə qayıdan azərbaycanlı ailələrin övladları artıq məktəbə gedirlər. Onların yaş və sinif kateqoriyasına uyğun dərsləri keçirilir.

Milli Məclisin Elm və təhsil komitəsinin sədr müavini Musa Qasımlı saytımıza açıqlamasında xəbəri təsdiqləyib. Deputat bildirib ki, Azərbaycan bununla bağlı operativ addım atan ilk ölkədir:

“Ərazisində müharibə gedən Ukraynadan vətəndaşlarımızın təxliyəsi artıq rəsmi məlumat verildiyi kimi bilavasitə dövlət başçımızın nəzarəti altındadır. Onların təxliyəsi ardıcıl həyata keçirilir. Eyni zamanda ölkəmizə gələn azərbaycanlıların məktəb yaşlı övladlarının yerləşdikləri rayonlardakı müvafiq məktəblərdə təhsillərini davam etdirməsi üçün də addım atılıb. Məlumatıma görə, şagirdlərin təhsildən geri qalmaması üçün mümkün məsələlər həll edilir”.

modern.az