2021-2022-ci tədris ilinin payız semestri üzrə təhsil tələbə krediti almaq üçün müraciət edən tələbələr arasında pedaqoji yönümlü ixtisaslarda təhsil alanlar üstünlük təşkil edir. Belə ki, müraciətlərin statistikasına nəzər saldıqda ilk onluqda biznesin idarə edilməsi, Azərbaycan dili və ədəbiyyatı müəllimliyi, iqtisadiyyat, tarix müəllimliyi, tarix və coğrafiya müəllimliyi, ibtidai sinif müəllimliyi, maliyyə, xarici dil müəllimliyi (ingilis), menecment, riyaziyyat və informatika müəllimliyi ixtisasları yer alıb.
AzEdu.az xəbər verir ki, bu məlumat Təhsil Tələbə Krediti Fondunun tədris ilinin payız semestri üzrə rəsmiləşdirilmiş təhsil kreditlərinə dair hesabatında göstərilib.
Hesabata əsasən 2021-2022-ci tədris ilinin payız semestri üzrə təhsil tələbə krediti ilə bağlı 5 min 678 müraciət daxil olub. Müraciətlərin 63 faizi (3590) yekunlaşdırılıb, 2 min 88 müraciət isə yekunlaşdırılmayıb. Yekunlaşdırılmamış müraciətlərin statistikasına əsasən 2 min 88 müraciətdən 1461-də tələbə sistemə daxil olub, lakin heç bir əməliyyat aparmayıb. 627 ərizəçi isə kredit hüququ olmayandır, yəni tələbə deyil. 3590 tələbə müraciətini yekunlaşdırıb. Bu tələbələrdən 1116 nəfəri sosial, 1783 nəfəri standart təhsil tələbə krediti alıb. 691 tələbənin müraciətindən imtina olunub.
Xatırladaq ki, 2021-2022-ci tədris ilinin payız semestri üzrə təhsil tələbə krediti ilə bağlı müraciətlərin qəbuluna 2021-ci il noyabrın 25-də başlanılıb. 2022-ci il fevralın 15-də payız semestri üzrə kreditlərin verilməsi yekunlaşdırılıb, fevralın 16-dan etibarən isə 2021-2022-ci tədris ilinin yaz semestri üzrə təhsil tələbə krediti ilə bağlı müraciətlərin qəbuluna start verilib.
Təhsil tələbə kreditinin ayrılmasında məqsəd təhsilin hamı, xüsusilə də əhalinin aztəminatlı təbəqələrindən olan şəxslər üçün əlçatanlığının təmin edilməsi, təhsildə bərabər imkanların yaradılması və təhsilin əhatə dairəsinin genişləndirilməsidir.
