Tərtərdə təhsil işçilərinin sentyabr konfransı keçirilib.
AzEdu.az xəbər verir ki, Heydər Əliyevinn xatirəsini yad etməklə başlanan tədbir Mədəniyyət Mərkəzinin zalında davam edib.
Rayon təhsil şöbəsinin müdiri Surxay Mirzəyev konfransı açıq elan edərək, təhsil işçilərini yeni dərs ilinin başlanması münasibəti ilə təbrik edbi, tədbir iştirakçıları konfransın gündəliyi ilə tanış olublar. S.Mirzəyev “2017-2018-ci dərs ilinin yekunları və yeni dərs ilində qarşıda duran vəzifələr barədə” məruzə edbi.
Məruzəçi ötən tədris ilində görülən işləri ətraflı təhlil edərək, bildirib ki, rayon məktəbliləri 2017-2018-ci tədris ilində müxtəlif fənn olimpiadalarında, yarış və müsabiqələrdə iştirak edərək qalib olublar. Bu bu il ali təhsil ocaqlarına sənəd verən 363 nəfərdən 224 nəfəri ali (onlardan 191 nəfəri bu ilki, 33 nəfər isə əvvəlki illərin məzunlarıdır), 108 nəfəri isə orta ixtisas məktəblərinə daxil olunub. Onlardan 10 nəfəri 600-dən yuxarı, 19 nəfəri 500-dən yuxarı bal toplayıblar. 600-dən yuxarı bal toplayan 10 nəfərin 4 nəfəri şəhər 2 saylı, 2 nəfəri şəhər 1 saylı, 1 nəfəri şəhər 6 saylı, 1 nəfəri Bəyimsarov, 1 nəfəri Dəmirçilər, 1 nəfəri isə Seydimli kənd tam orta məktəbin məzunlarıdır. Ali məktəblərə qəbul zamanı şəhər 1 saylı (31 nəfər), şəhər 2 saylı (26 nəfər), Güləbatlı (10 nəfər), Qapanlı (8 nəfər), kənd tam orta məktəbləri fərqləniblər. 1 nəfər C.Naxçıvaniski adına hərbi liseyə daxil olub.
S.Mirzəyev qeyd etdi ki, respublikamızın hər yerində olduğu kimi Tərtər rayonunda da təhsil müəssisələrinin maddi-texniki bazasının möhkəmləndirilməsi istiqamətində işlər görülür, təhsil ocaqları təmir olunur, yeni məktəblər tikilir. Ötən tədris ilində şəhər 6 saylı tam orta və Qazyan kənd ümumi orta məktəbləri əsaslı təmir olunub, Bayandur, Poladlı kəndləri üçün modul tipli məktəblər tikilərək istifadəyə verilib. Seydimli kənd tam orta məktəbinin əlavə korpusu əsaslı təmir və Qaradağlı kənd tam orta məktəbinin bir korpusu Yaponiya Səfirliyinin maliyyə dəstəyi ilə əsaslı təmir olunub. Azərbaycan Respublikasının Prezidenti cənab İlham Əliyevin Sərəncamı ilə hazırda Zolgəran kənd ümumi orta və Kovdadıq kənd ibtidai məktəbləri üçün modul tipli məktəblərin tikintisinə hazırlıq işləri aparılır, Təhsil Nazirliyi tərəfindən Buruc kənd tam orta məktəbində cari təmir işləri aparılır. Digər məktəblərdə də daxili imkanlar hesabına təmir işləri aparılaraq, səliqə-sahman yaradılmış, yaşıllıqlar salınmış və məktəblər yeni dərs ilinə tam hazırlanmışdır.
Məruzə ətrafında Güləbatlı kənd tam orta məktəbinin müəllimi Vəfa Quliyeva, Dəmirçilər kənd tam orta məktəbin məzunu, Qızıl medal mükafatçısı, Olimpiada qalibi (659 bal) Kubra Bayramova, Şəhər 5 saylı tam orta məktəbin müəllimi Nigar Vəliyeva, şəhər 1 saylı tam orta məktəbin məzunu (687 bal) Laçın Əliyeva, Sarıcalı kənd tam orta məktəbin gənc müəllimi Esmira Qəhrəmanova, Tərtər hazırlıq kursunun rəhbəri Elməddin Əsgərxanov və Milli Məclisin deputatı Ağalar Vəliyevin köməkçisi İlham Musayev çıxış ediblər.
Tədbirdə iştirak edən Azərbaycan Respublikasının Təhsil Nazirliyinin nümayəndəsi Təhsil İnstitutunun direktor müavini Ənvər Abbasov çıxış edərək təhsil işçilərini yeni dərs ili münasibəti ilə təbrik edib və qarşıda duran vəzifələrdən danışıb.
Konfransda çıxış edən rayon icra hakimiyyətinin başçısı Müstəqim Məmmədov rayonun təhsil işçilərini yeni dərs ilinin başlanması münasibətilə təbrik edərək onlara uğurlar arzulayıb. Son illər respublikamızda, o cümlədən rayonda təhsilin səviyyəsinin yüksəldilməsinə, maddi-texniki bazasının möhkəmləndirilməsinə göstərilən dövlət qayğısından, Prezident İlham Əliyevin bu sahədə gördüyü ardıcıl tədbirlərdən, habelə Birinci vitse-prezident Mehriban xanım Əliyevanın xidmətlərindən ətraflı danışdı, rayonumuzun ictimai-siyasi həyatında müəllimlərin və ziyalıların rolundan söhbət açıb, təhsil işçilərinin qarşısında duran mühüm vəzifələri diqqətə çatdırılıb.
Tədbirin sonunda bir qrup təhsil işçisinə, 600 və 500-dən yuxarı bal toplayan tələbələrə rayon icra hakimiyyəti, Milli Məclisin deputatı Ağalar Vəliyev tərəfindən Fəxri Fərman, qiymətli hədiyyələr və pul mükafatları verilib.
