Bakı Mühəndislik Universitetinin (BMU) tələbələrdən ibarət komandalarının Türkiyənin Adana şəhərində keçiriləcək “TEKNOFEST-2024” Aerokosmik və Texnologiya Festivalında iştirakı planlaşdırılır. Artıq onlardan birininin - “RED” komandasının hansı kateqoriya və layihə ilə yarışa qatılacağı müəyyənləşib.
AzEdu.az xəbər verir ki, dünyanın ən böyük texnologiya yarışlarının keçiriləcəyi “TEKNOFEST 2024” bu il ümumilikdə 46 fərqli kateqoriya və 117 alt kateqoriyada təşkil olunacaq.
Müxtəlif illərdə “RED” və “RED X” adları altında və fərqli tərkibdə “TEKNOFEST”- də təmsil olunan BMU-nun tələbələrdən ibarət komandası hər dəfə uğurlu iştirakı ilə yadda qalıb. 2022-ci ilin may ayında ilk dəfə Bakıda keçirilən “TEKNOFEST Azərbaycan”da qalib olan “RED” komandasına mükafat Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın festivalda iştirakı zamanı təqdim edilib.
Komanda Türkiyədə keçirilən “TEKNOFEST-2023”də də nailiyyət əldə edib. Hazırladığı PUA ilə 2700 komanda arasından seçilərək, 120 komanda ilə bərabər finala vəsiqə qazanan “RED X” ilk beşliyə daxil olub və IV yerdə qərarlaşıb. Komandaya Türkiyə Texnologiya Komandası Vəqfi (T3) və Türkiyə Elmi və Texnoloji Tədqiqat Şurası (TÜBİTAK) tərəfindən festivalın “Performans Ödülü”, eyni zamanda festivalda əldə etdikləri nailiyyətlərinə görə bütün komanda üzvlərinə “Katılım” sertifikatları və “Təşəkkürnamə”lər təqdim edilib.
