Ciddi iş, gərgin əməklə məşğul olan hər bir insanın istərklərindən biri də yay tətili istirahətdir. Bunu isə müxtəlif məkanlarda, fərqli şəkildə həyata keçirmək mümkündür.
Bəs, məktəbdə şəxsiyyətin ahəngdar inkişafında böyük rolu olan müəllimlər yay istirahətini necə və harada keçirəcək?
AzEdu.az bununla bağlı müəllimlərin fikrini öyrənib:
Əmirəhməd Quliyev adına 121saylı tam orta məktəbin Azərbaycan dili və ədəbiyyat müəllimi Rzaqulu Məmmədov yay tətilini elə öz kəndklərində keçirməyi planlaşdırır:
“Mən adətən, hər il bölgələrimizdən ikisində və ya üçündə hər birində bir neçə gün olmaqla dincəlməyə çalışıram. Son avqust ayını isə Naxçıvanda, doğulduğum yerdə keçirirəm. Ən maraqlısı və cibə uyğunu da elə öz kəndimizdir. Nostalji yaşamaq, keçmiş uşaqlıq illərinin izlərini görmək, daha maraqlı olur”.
Ağsu rayon Kalva kənd orta məktəbin fransız dili müəlliməsi Nilufər Müslümova isə yay tətilini elə öz evlərində keçirəcəyini deyir:
“Əsasən evdə olacam və maddi imkanım çatana qədər ara-sıra bəzi bölgələrə baş çəkməyi düşünürəm”.
Gədəbəy rayonu 1saylı tam orta məktəbin coğrafiya müəllimi Tural Topçuyev də digər həmkarları kimi büdcəsinə uyğun hərəkət edəcəyini vurğulayır:
“ Müəllimə istirahət daha vacibdir, çünki doqquzaylıq beyin yorğunluğunu yalnız istirahətlə aradan qaldırmaq mümkündür. Biz II qrup imtahanı ilə əlaqədar olaraq 26.07.2018-ci il tarixədək işləməliyik. Ondan sonra qısamüddətli də olsa, istirahət barədə düşünürəm. Bu sözsüz ki, büdcəmizə uyğun olacaq”.
Laçın rayon Taxtakörpü qəsəbə tam orta məktəbin ingilis dili müəlliməsi Şəbnəm Cəbrayıl dağlıq rayonların birində istirahət etmək fikrindədir:
“Yay tətili hər bir insan üçün olduqca önəmlidir, müəllimlər üçün isə daha çox əhəmiyyət kəsb edir. Çünki, müəllimlik elə bir peşədir ki, il uzunu məsuliyyət ilə proqram bitirmək, şagirdlərin irəliləyişlərini diqqətlə müşahidə etmək və onlara istər elmdə, istərsə də aktiv həyatda dəstək olmaq üçün yüksək səviyyədə enerji tələb edir. Müəllimin bol enerji yığması və növbəti ilə yüksək motivasiya ilə başlaması üçün istirahətə ehtiyacı daha çoxdur. Ölkəmizin coğrafi mövqeyi elə gözəldir ki, burada istənilən istirahəti həyata keçirmək üçün gözəl rayonlar , kəndlər var lakin təəssüflər olsun ki, Azərbaycanda turizm arzu olunan şəkildə inkişaf etməyib, həddindən artıq bahalıqdır və xidmət səviyyəsi olduqca aşağıdır. Bir müəllimin maaşına uyğun istirahət mərkəzi çox azdır.
Bir aran rayonunda çalışırıq çox ehtimal ki, istirahətimizi də dağlıq rayonların birində edərik. Bütün həmkarlarıma və hər kəsə xoş istirahətlər arzu edirəm.
Aynur Qarayeva,Saatlı rayon Hacıqasımlı kənd orta məktəbin ibtidai sinif müəllimi: Yay istirahətini ən çox ən az ölkədaxili sərin və təbiət qoynunda olan rayonları gəzərək keçirməyi arzulasam da amma bir neçə ildir ki, mümkün olmur. Həm maddi, həm də vaxt baxımından qohum dost evlərinə qonaq getməklə fərqlilik yaratmağa çalışıram. Öz adımdan deyə bilərəm ki, yalnız qəbul edib, qonaq gedirəm və dərs vaxtı qoşula bilmədiyim təlimlərə qoşularaq, peşəkarlığımı artırmağa çalışıram. Ümumiyyətlə, həmkarlarıma baxdıqda deyə bilərəm ki, tətil bizə əlçatmazdı. Ali məktəb imtahanları, yerdəyişmə, MİQ həyəcanı yeni dərs ili başlayana qədər bütün tətil müddətini zəbt edir”.
Günel Yaşarqızı
