AzEdu.az hamının tanıdığı sənət adamları, ictimai şəxslər, idmançılar, media nümayəndələrinin məktəb illərindən bəhs edən silsilə yazılarını davam etdirir.
“Parta etirafları” rubrikasının növbəti qonağı Azərbaycanın sevilən xanəndəsi, Xalq artisti Canəli Əkbərovdur.
Məktəbdə müəllimlərin sevimlisi olduğunu deyən C. Əkbərov, həmin illərin onun üçün çox gözəl xatirələrlə yadda qaldığını vurğulayır:
“Məktəb illəri hamı üçün əzizdir, o illərlə bağlı çox xatirələrim var. O xatirələrin hamısını sadalasam, roman yazmaq olar, çünki mən xatirəçiyəm...(gülür).
1940-cı ildə Lənkəran rayonunun Tükəvilə kəndində anadan olmuşam və elə orada orta məktəbə getmişəm. Məktəb illəri mənim üçün bu gün də çox sevincli, olduqca gözəl günlər kimi yadda qalır. Mən o zaman bütün fənləri sevmişəm, eyni zamanda, müəllimlərin sevimlisi olmuşam. Müəllimlər də, sinif yoldaşlarım da - hamı məni çox istəyirdilər. Çünki xoş-əhval ruhiyyəli gənc insan idim.
Orta məktəbdə oxuduğum illərdə qiymətlərim hər zaman yaxşı olub. Hər hansı fəndən kafi qiymət aldığımı xatırlamıram. Müəllimlər hər zaman bizə hörmət edib və bizdə müəllimlərə hər zaman hörmət etmişik”.
Canəli Əkbərov sonradan muğamın sirlərini necə öyrəndiyindən , xaricdə olduğu qastrol səfərlərindən də bizə danışıb:
“Mən balacalıqdan muğamın sirlərini atamdan öyrənmişəm. Atam Xanəli Əkbərov tanınmış xanəndə olub, çox nüfuzlu muğamatçı Kərbəlayi Ağaməhəmmədin oğludur. Onun yoldaşları da gözəl sənətkarlar idi. Atamın yoldaşları Bəhram Mansurov, Hacı Məmmədov, Sərvər İbrahimov - bunların hamısı bizim evdə olardı.
Mən atamın sənət yoldaşlarının tarını götürüb, gizlincə çalardım. İstəyirdim ki, atam görməsin.
İlk müəllimim olan atam toylarda oxuyar və məni də tez-tez özüylə aparardı. Beləcə, muğam qəlbimə hopurdu, amma gələcək həyatımın seçimi olacağını hələ dərk etmirdim.
23 yaşımda sənədlərimi aparıb Asəf Zeynallı adına Musiqi Məktəbinə (indiki Bakı Musiqi Kolleci) verdim. Qəbul imtahanı zamanı Seyid Şuşinski, Mütəllim Mütəllimov və Əhməd Bakıxanov tərəfindən dinlənildim.
Seyid Şuşinski respublikanın ilk peşəkar muğam müəllimi olub. Bütün imtahanlardan “əla” alıb muğam ifaçılığı bölməsinə qəbul olundum Opera və Balet Teatrında uzun illər işləyərək bir sıra yadda qalan obrazlar: Məcnun və İbn-Səlam (Ü.Hacıbəyov – “Leyli və Məcnun”), Şah İsmayıl (M.Maqomayev – “Şah İsmayıl”), Aşıq Qərib (Z.Hacıbəyov – “Aşıq Qərib”) yaratmış , bütün obrazlarda oynamışam. Bir çox xarici ölkələrdə - Almaniyada, Malidə, Avstriyada və s. ölkələrdə dəfələrlə qastrol səfərlərində olmuşam. Xaricdə olduğum zaman Azərbaycan muğamını dünyaya gəzdirdim. Müəllimlərim Seyid Şuşinski və Xan Şuşinskidən muğam ifaçılığının qayda-qanunlarını mənimsəyib və öz ifaçılıq qabiliyyətini təkmilləşdirmişəm”`.
Qeyd edək ki, Canəli Əkbərova 1989-cu ildə Azərbaycan Respublikasının əməkdar artisti, 1992-ci ildə isə xalq artisti fəxri adları verilib. O, 2002-ci ildə Şöhrət ordeni ilə təltif olunub.
Günel Yaşarqızı
