AzEdu.az  hamının tanıdığı sənət adamları, ictimai şəxslər, idmançılar, media  nümayəndələrinin məktəb illərindən eləcə də oxuduğu kitablardan bəhs edən  silsilə yazılarını davam etdirir.

Bu dəfəki  qonağımız Azərbaycan kinosunda bir çox məşhur rolları ilə sevilən aktyor,  Xalq artisti  Ənvər Həsənovdur.

Xeyli sayda  kitab oxuduğunu deyən Ənvər Həsənov,  mütaliəyə marağın  böyük olduğunu bildirib:

“Mən çox mütaliə  etmişəm. Amma  təəssüf ki,  iki ildir, kitab oxumuram.  Səhhətimlə əlaqədar  nə kompüterə yaxın gedirəm, nə ismarıc göndərə bilirəm nə də kitab oxuyuram. Son vaxtlar isə boş vaxtlarımda  ancaq krossvord doldurmaqla məşğul oluram.

Evimdə 1500-ə qədər  kitab var, ömür boyu kitab həvəskarı olmuşam.  Kitaba həvəsim o qədər çox olub  ki, hətta kitab dalınca Slovakiya, Almaniyaya qədər getmişəm. Bunu yaxın  dostlarım da bilir . Evimdə çox nadir kitablarım  da  var. 

Bu gün  sizi inandırım  ki, hərdən nəvələrimə, uşaqlarıma baxıb, deyirəm ki,  ay Allah, bu qədər kitabı mən niyə yığmışam?!

Onları da qınamıram, çünki  əllərindən kompüter düşmür,  onları nə maraqlandırırsa,  elə kompüter vasitəsilə  öz istəklərini, arzularını həyata keçirirlər.

Amma bizim zamanımızda bu, bir qədər fərqli idi.  Bizim bütün öyrəndiklərimiz, bildiklərimiz, ekrana çıxardıqlarımızın hamısı kitab vasitəsilə olurdu.

Mən 2008-ci ildə qəza keçirdim  səhhətimdə problem yarandı. Başımda olan  damarların biri səhv tikildi  ona  görə   başımda bu  an elə   səs var ki,  on ildir mən o səslə yaşayıram. Onun qarışısını da almaq olmur. Çətinliklə yatır, eləcə də  dururam.   Bu səbəbdən, çox əziyyət çəkirəm və  ona görə də çox zaman oxuduqlarımı xatırlamıram. 

Çox  zaman yanımda insanların adını çəkirlər, amma     inandırım sizi,  adlarını xatırlaya bilmirəm.  

Mənə hörmət edən,  tanıdığım   dostlarım  da bilir ki,bütün bunlar  mənim üçün nə qədər  çətindi. Mənə salam göndərirlər, məsələn,  Tofiq adlı birisi sənə salam göndərir,  soruşuram ki, hansı Tofiq, harada işləyir? Deyirəm ki, məni qınamayın, üzünü görəndə yadıma sala bilirəm ki, bu insan kimdir”.

Ənvər Həsənov məktəb  xatirələrini və o illərdə  sevdiyi məşğuliyyətini də  bizimlə bölüşüb:

“Mən hələ 8-ci sinifdən Kinostudiyaya gəlib, burada   rejissor köməkçisi kimi  iş  fəaliyyətinə başladım. 15 yaşımdan kinodayam və 50-dən çox filmə çəkilmişəm . Azərbaycanın ən güclü rejissor, aktyor, rəssam və bəstəkarları ilə bərabər işləmişəm.

Rejissorlardan Ədil İsgəndərov, Tofiq İsmayılov, Həsən Seyidbəyli, Hüseyn Seyidzadə, Arif Babayev, aktyorlardan Məmmədrza Şeyxzamanov, Mirzə Babayev, Həsən Məmmədov, Həsənağa Turabov, Şahmar Ələkbərov, Muxtar Maniyev və neçə-neçə böyük kino xadimləri ilə çalışımışam.

Məktəb illərində isə çox sakit    deyildim, əksinə, dəcəl uşaq olmuşam. İçərişəhərdə böyüyən uşaqlar çox zaman diribaş olurlar, mən də  orada  böyümüşəm. Məktəb illərində  idmanla məşğul olmuşam,  7 idman növü  üzrə dərəcəm var. Həyatımın çox hissəsini demək olar ki, idmana həsr etmişəm. Məktəb illərində  kinostudiyada aktyorluq fakültəsində oxuyur,  həm    rejissor köməkçisi kimi işləyirdim. Üstəlik,   gecələr də gecə məktəbinə gedirdim.

Məktəb illərində ən xoşladığım fənn Tarix, Coğrafiya, Rus dili olub.   Dərslərimdən  kafi qiymət də almışam. Açıq etiraf edim ki, məktəb illlərində mən “əlaçı” şagird olmamışam.

Müəllimlərlə münasibətim də yaxşı olub  onlara hər zaman hörmət etmişəm eləcə də onlarda mənə. Müəllimlərimin hər zaman sevimlisi olmuşam onlar məni çox istəyirdi. Məktəb illərində dəcəl şagird olmağıma baxmayaraq  amma yadıma gəlmir ki, müəllimin məni döysün  bu kimi hadisələri xatırlamıram”.

Qeyd edək ki, Ənvər Həsənov Azərbaycan kino sənətinin inkişafındakı xidmətlərinə görə 18 dekabr    2000-ci ildə Azərbaycanın  Əməkdar artisti, 1 avqust 2018-ci ildə isə xalq artisti fəxri adlarına layiq görülüb.

    Günel Yaşarqızı