AzEdu.az hamının tanıdığı sənət adamları, ictimai şəxslər, idmançılar, media nümayəndələrinin məktəb illərindən, eləcə də oxuduğu kitablardan bəhs edən silsilə yazılarını davam etdirir.
Bu dəfəki qonağımız Milli Məclisin deputatı, Vəhdət Partiyasının sədri Tahir Kərimlidir.
Xeyli sayda kitab oxuduğunu deyən Tahir Kərimli, mütaliənin onun üçün həyat tərzi olduğunu bildirib:
“Oxumaq mənim üçün həyat tərzidir. Hazırda da Əlisa Nicatın kitabını oxuyuram. Ondan əvvəl isə ermənilərin Azərbaycana təcavüzündən bəhs edən Zəhra Quliyevin faciəsi ilə bağlı yeni çapdan çıxmış kitabını oxuyurdum. Dayanmadan oxuduğum ən mühüm kitab isə Azərbaycan parlamentalizm tarixinə aid Musa müəllimin yazdığı kitabdır.
Gəncliyimdə adətən, bədii kitabları daha çox oxuyardım. Amma 14 yaşından atama məxsus Karl Marksın “Kapital”, Fridrix Engelsin “Anti-Dürinq” kitablarına baxmaq istəyirdim, amma başa düşmürdüm.
Həmin kitabları oxuduğumu sübut etmək üçün içindəki şeirləri əzbərləyirdim. Məsələn, Şeksprin bir şeirini Karl Marks öz əsərində misal gətirib, mən də o şeirləri əzbər öyrənirdim.
İndi daha çox siyasi -fəlsəfi mövzulu yaxşı bədii kitablar olanda, onları oxuyuram. Görkəmli rus yazıçısı Lev Tolstoyun İbrahim haqda kiçik məqaləsi var çox təsir edicidir onu övladlarımada oxuyardım hətta idi nəvələrimə də oxuyuram .
Uşaqlıqdan Mirzə İbrahimovun “Gələcək gün” romanını çox bəyənmişdim. Romanda İkinci Dünya Müharibəsi ərəfəsi və müharibənin ilk ayları Cənubi Azərbaycanın ictimai-siyasi həyatında baş verən hadisələr geniş epik lövhələrdə, fikri dərinlik və ustalıqla təsvir olunur. O roman mənim həyatımda, hüquqşünas olmağımda böyük rol oynayıb.
“Gələcək gün” romanında Firudin hüquq fakültəsinə ona görə daxil olur ki, öyrəndiyi respublikaçılığı, demokratik fikri öz ölkəsinə də tətbiq edə bilsin. Çünki xarici dövlətlərin hüquq sistemi həmin fakültədə tədris olunurdu.
İrland yazıçısı Etel Lilian Voyniç tərəfindən yazılan “Ovod” romanını da çox bəyənirəm. Bu əsər XIX əsrin 30-cu illərində italyanların işğalçı Avstriya –Macarıstan İmperiyasına qarşı üsyanından, bu üsyanın iştirakçılarından biri olan Artur Bertonun faciəli həyatından bəhs edir.
Arturun əqidəsi uğrunda ailəsini qurban verməyi, öz ideyasını üstün tutmağı, inqilab uğrunda mübarizliyi bu obrazı mənə hədsiz dərəcədə sevdirib”.
Tahir Kərimli XVIII əsrin görkəmli Azərbaycan şairi olan M.P.Vaqifin qoşmasını, Azərbaycan və türk tarixində divan janrının ən görkəmli nümayəndəsi olan M.Füzulinin qitəsini bizim üçün əzbər söyləyərək təhlil edib:
“M.P. Vaqifin “Pəri” qoşması çox xoşuma gəlir. Orada Azərbaycan xanımının sadəliyi, geyimi, gözəlliyi öz əksini tapıb. Qoşmada gözəlin obrazı əks olunub. Həmin o şeiri sizə indi də əzbər deyə bilərəm.
“Boyun sürahıdır, bədənin büllur,
Gərdənin çəkilmiş minadan, Pəri!
Sən ha bir sonasan, cüda düşübsən
Bir bölük yaşılbaş sonadan, Pəri!
İxtilatın şirin, sözün məzəli,
Şəkər gülüşündən canlar təzəli,
Ellər yaraşığı, ölkə gözəli,
Nə gözəl doğubsan anadan, Pəri!
Azərbaycan klassik ədəbiyyatının görkəmli nümayəndəsi Məhəmməd Füzulinin “Padişahi-mülk” qitəsi nə qədər mürəkkəb olsa da onu çox xoşlayıram.
Padişahi-mülk, dinarü-dirhəm rüşvət verib,
Fəthi-kişvər qılmağa eylər mühəyya ləşkəri.
Yüz fəsadü fitnə təhrikilə bir kişvər alır,
Ol dəxi asari-əmnü istiqamətdən bəri.
Göstərən saətdə dövrani-fələk bir inqilab,
Həm özü fani olur, həm ləşkəri, həm kişvəri
Burada göstərir ki, dünya sultanlarının var-dövləti, qoşunu hər şeyi əldən gedər. Amma mən söz sultanı olduğum üçün sözümün gücü dünyaları, okeanları, əhatə edər.
Başqa bir qəzəlində şair elə ilk beytdəcə eşqindən onu yalnız ölümün ayıra biləcəyini deyir: “Pənbəyi-daği-cünun içrə nihandı bədənim, diri olduqca libasım, ölər olsam kəfənim”.
Göründüyü kimi, lirik qəhrəman ölsə, ona çəkilən dağların üstündən basılan pambıqların kəfəni olacağını bildirir. Füzuli iki misralı beytlə dahi açılışlar, fəlsəfi fikirlər verə bilir”.
Tahir Kərimli məktəb illərində gülərək yada saldığı xatirələrini də bizimlə bölüşüb:
“Mən Ağsu şəhər 1 saylı orta məktəbi bitirmişəm. Məktəb illərində hər zaman “əlaçı” şagird olmuşam. Ağsu şəhər 1200 nəfərlik məktəbinin
şagird komitəsinin sədri, sinif nümayəndəsi idim. O illərdə mən çox utancaq idim, hətta heç pencəyimi də əynimdən çıxartmırdım. Ciddi və ağır təbiətli şagird olmuşam.
Heç vaxt yadımdan çıxmaz, bir dəfə gözləmədiyim anda sinfin qızları pencəyimi əynimdən çıxartdılar ki, səndə camaata qayna- qarış.
Məktəb illərində o zaman “Romoe və Cülyetta” filmi gedirdi ona baxmaq istəsəm də, utandığımdan izləməyə getmirdim.
Orta məktəbdə ən çox sevdiyim fənn Tarix idi.
Məktəb illərində kafi qiymətlərim də olub, bəlkə “2” də, “3”də almışam. Amma adətən, fənlərdən qiymətlərim “5” olurdu.
Elə qiymətlərdən danışmışkən, Tahir müəllim, başqa bir məktəb xatirəsinə də keçid alır:
“Fizikadan hər dəfə dərsə hazır olmağıma baxmayaraq, bir dəfə yaxşı hazırlaşmamışdım. Gözləmədiyimiz anda komissiya gəldi.
Həmin anda da dərsimi yaxşı öyrənməmişdim. Fikirləşirdim ki, bu dəfə müəllim məndən dərs soruşmayacaq.
Yaxşı oxuyan şagird olduğum üçün müəllim yenidən məni lövhəyə çağırıb, dərs soruşdu.
Cavab verməkdə çox çəkdiyim üçün müəllim mənə “3” verdi. Müəllim özü də hirsləndi ki, sənə güvənib, lövhənin qarşısına çıxardım, amma sən məni biabır etdin...(gülür)
Dərslərimi hər zaman yaxşı oxumağıma baxmayaraq amma belə hallar da olub”.
Qeyd edək ki, Tahir Kərimli 1983-cü ildə BDU-nun Hüquq fakültəsini bitirib. Hərbi xidmətdən sonra çilingər, təsərrüfat müdiri, hüquq məsləhətçisi, məhkəmə iclas katibi, hakim əvəzi, İsmayıllı rayon xalq hakimi işləyib. O, İsmayıllı rayon XDS-nin deputatı (1990-1993), AR Ali Sovetinin deputatı (1990-1995) olub.
Günel Yaşarqızı
