“Dünəndən mətbuatda yayılır ki, artıq Türkiyə universitetlərinə attestatla qəbul dayandırılır. Bu belə deyil.”
AzEdu.az xəbər verir ki, bu sözləri şəxsi feysbuk hesabında təhsil eksperti Kamran Əsədov deyib.O qeyd edib ki, Azərbaycan Respublikası Təhsil Nazirliyi və Türkiyənin YÖK (Yükseköğretim Kurumu) arasında imzalanan qarşılıqlı iş birliyi protokolunda azərbaycanlı tələbələrin Türkiyədə fəaliyyət göstərən universitetlərin qəbulunda Azərbaycan Dövlət İmtahan Mərkəzinin imtahan nəticələri nəzərə alınması tövsiyə olunur:
“Bu tövsiyə xarakterli Türkiyə YÖK-ün öz universitetlərinə xəbərdarlığıdır.
Azərbaycanda attestat alan hər kəs onsuz da DİM-in buraxılış imtahanında iştirak edib attestat alır. Deməli, hər kəsin bu DİM imtahan nəticəsi var. Eyni zamanda Türkiyəyə gedənlər burada yetərli bal toplaya bilməyənlərdir. Deməli onların qəbul imtahan nəticəsi də var. Sənəddə hər hansı bir keçid balı nəzərdə tutulmur. Deməli imtahanda iştirak, hətta 1 bal belə yetərlidir.
Türkiyədə ali məktəbə qəbul olmaq, bakalavr təhsili almaq üçün SAT və ya universitetlərin öz YÖS imtahanına girmək lazımdır. Magistr təhsili üçün isə ALES imtahanından keçməlisiz. Və bəzən Universitetlərdən asılı olaraq bu imtahan GRE və ya GMAT imtahanı ilədə əvəz oluna bilər. Magistr üçün tezsiz proqramlara ALES imtahanına ehtiyac qalmır.
Hər iki halda əgər ingilis dilində təhsil almaq istəyirsizsə, onda sizin minimum 75 TOEFL nəticəniz də olmalıdır. İki ölkə arasında imzalanmış sənəddə ali məktəblərə attestatla qəbula qadağa nəzərdə tutulmur. Əgər bu olsa Azərbaycan Respublikası Təhsil Nazirliyi öz təhsilinə, verdiyi sənədə inanmır deməkdir”.
Xatırladaq ki, Global Karyera İnstitunun direktoru Orxan Həsənoğlu AzEdu.az-a açıqlaması zamanı Azərbaycan Respublikası Təhsil Nazirliyi və TürkiyəninYÖK (Yükseköğretim Kurumu) arasında imzalanan qarşılıqlı iş birliyi protokolunda azərbaycanlı tələbələrin Türkiyədə fəaliyyət göstərən universitetlərin qəbulunda Azərbaycan Dövlət İmtahan Mərkəzinin imtahan nəticələrinin nəzərə alınmalı olduğunu bildirib.
